Pepita, la primer vacunada n'Asturies: "Mientres esto nun baxe, nun salimos"

Cola inoculación a Pepita entama n'Asturies l'alministración de la segunda dosis de la vacuna

La usuaria de la Residencia La Mista, de Xixón, Eulalia Josefa Paleo, de 80 años, fixo güei un llamamientu a tola ciudadanía pa que s'inmunice escontra la COVID-19 tres recibir la segunda dosis de la vacuna. "Mientres esto nun baxe na cai, nós nun salimos", alvirtió la vieya, natural de Lugo y conocida como Pepita poles sos amistaes.

Cola inoculación de la segunda dosis a Pepita y al restu de residentes y trabayadores de La Mista -el mayor xeriátricu del Principáu con 300 usuarios y unos 300 emplegaos- entamó n'Asturies l'alministración de la segunda dosis de la vacuna dientro d'una campaña na que, hasta'l vienres, vacunárase a unes 30.000 persones, el 3% de la población.

"Hai que vacunase toos, si non esto nun va. La xente tien qu'entender qu'esto cada vez va a más y que, si nun se faen les coses bien, tamos equí anguaño, al otru y a saber hasta cuando", señaló Pepita, amosando'l mesmu ánimu que yá amosó pa recibir la primer vacuna que se ponía n'Asturies a la hora de recibir la segunda dosis.